【我的投機旅程】

【我的投機旅程】

由零知識開始計起，不經不覺已經進入投機的第八個年頭。

一切由一個技術分析入門班開始，大學year 2 的時候，誤打誤撞下reg左一個技術分析入門班。當時Reg依科既原因好幼稚，就係因為Technical 依個字，個名好似好勁咁就報左，實際我當時係完全唔知咩黎，而且個課程係第一年開，無任何人知伏唔伏。

第一堂，個教授先講易經，再講陰陽八卦。然後話自己唔在意錢，因為佢只需要知佢幾時同要幾多，佢就可以係市場拎番黎。一班40人，39個人恥笑了這位教授。

無錯，我就係無笑既唯一一個。無笑係因為我當時覺得，佢用平淡既語氣講依番說話，唔似係講笑。

唔洗問有無得報啦，個教授已經退左休，而且教既內容無特別，只係極簡單地話比大家知，現存有咩既技術分析方法，只有introduction，沒有任何深入討論。

真正令我相信技術分析係之後既一份功課。

個課程係80%分數來自一份功課，上左三堂，就叫我搵一個交易機會，講點解買升/買跌，止損同目標價點訂。而三個月後會用市場對答案，最後交易成敗直接決定咩grade。

大佬呀，上左6個鐘堂，你就當我係分析師？

都無計，過左add drop period，我只能夠做好份功課。

我坐左係bloomberg terminal前面一個星期，睇左超過4000隻港股美股既圖表，最後搵到一個”完美”的好倉交易機會，隻野叫銀泰商業。

之後，銀泰商業係交功課後一個月內被收購，升到傻左，個教授話有跟機極少部份同學既交易機會，賺左7位數。我諗99%有我份功課，因為最後我個Grade係A。(P.S.但佢一蚊都無分番比我)

依個經歷令我知道，原來只要做足功課，係市場賺錢真係有可能。都係依個page名 – “投機先要溫功課”既由來。

第二年，開始接近狂熱地學習技術分析，大部份天地堂時間都係大學圖書館渡過，睇完一本又一本幾百頁，全英文既技術分析書籍。可惜既係，part time 錢有限，本少賺左都唔夠去玩。

第三年，上左Options and Future，先知原來只要有技術，本少一樣可以賺大錢。依一年我用左大部分時間去研究各種衍生工具，主力係期權。

第四年，開始番工，可憐既會計工作，對此我完全無興趣。但依份工作可以累積到本金比我投機，開始成為半職Trader，一邊番工，一邊做Trade。利潤都可觀，問題在於唔穩定，有些月份賺得多，有些月份埋單仲要輸佣金。

依一年參加左個交易比賽 – “輪神的誕生”，拎左個冠軍。重點唔係個獎，而係識左Alan – 紅磡索螺絲。因為個比賽，對左紅磡索螺絲幾個月，佢發現左我一個致命既問題，無好既風險管理方法，有些交易過份Aggressive，於他作為第三者角度，當時我部份交易是接近賭博。

好彩係我奶野之前識到Alan，又用左一年研究風險管理。

第五年，我整理左成個交易流程 – 叫做 ”投機十步曲”，將交易變得流程化。

流程化既好處係我確保每一個交易都經過完整分析。更重要既係所有被紀錄，不同交易策略的sample size不斷增加，更精準地了解每個策略的成功率和平均風險回報率。有系統地將經驗變成優勢，建立正向循環。

第六年，交易利潤已經每月穩定地超越全職工作收入。但當時想做夠3年拎埋個CPA，結果拖夠3年才resign。

依一年已經下定決心要全職投機，但卻覺得空虛寂寞凍，因為全職投機的朋友太少，我懷疑投機係世上最毒的職業。

突然見到我要做富翁搞左個比賽，一心諗住走出comfort zone，不再做毒撚，去參加個比賽，識番幾個交易員，結果識到人之餘仲贏左個比賽。

第七年，正式全職投機，感受到咩叫自由自在，開左個Discord Channel，識多左志同道合，一班對交易認真既朋友。

但去到年中，突然覺得人生無左目標，毅然決定2023年(第八年)一邊投機一邊去一年旅行，擴闊下自己既眼光，看看人生不同的可能性。

每個投機者都會有自己的路，不必跟誰比較。

我既投機路並不短，由零到可以全職交易足足用了5年。沒有甚麼破產負債洗心革面再翻身，也沒有甚麼裸辭破釜沈舟的劇情，只有每天一點一點的經驗累積，盡力做好每一件小事。

如果你問我，點先可以成為全職投機者，我答唔到你。

真係要我答，我會話係意外同運氣。

意外在於，當初我只係單純地對技術分析有好大興趣，探索過程意外地變為技能。若單純地為賺錢，我諗我堅持唔到咁多年。

運氣在於，交易路上遇到好多貴人，係我犯下大錯之前發現並解決問題，令我行既錯路比大部份人少，不需花雙倍時間行番正軌。

有些讀者同我講，佢地比我更幸運，原因是他們比我後生，投機初期學到”投機十步曲”，唔洗好似我咁由零創造一套系統。

我答佢，都係因為你對投機認真先會識到我，本身個page都預左唔多人睇，因為對投機認真係少數。我感激投機路上遇到既貴人。世界好公平，不能只Take，如果可以，我都希望我可以Give。

你的讚好是我續續更新的動力。

Patreon 只招待對投機認真的人，若想識一班有質素的Trading Buddy，加速學習時間，可訂閱加入Discord Channel。

IG︰https://www.instagram.com/study_b4_u_invest
FB︰https://www.facebook.com/studybe4uinvest

投機先要溫功課